sei la tsani cu fanva se'u sei la'o gy. Cassandra Clare gy. finti

ni'oni'o jy. nanla
ni'o ca lo nu jy. jai nanca li xa kei lo jy. patfu goi py. dunda lo falkono* goi fy. boi jy. gi'e minde jy. lo ka gau ce'u fy. tolcilce
ni'o fu'e sei py. jungau be jy. lo'e falkono cu catra zi'o gi'e tsani turni fu'o
no'i fy. boi jy. nalnei gi'e ji'a se nalnei
ni'o ge mu'igi fy se ja'urxe'a gi jy. xanka gi lo se gusni bo simlu je kanla be fy. simlu lo ka roroi zgana fy
.i ri'agi fy. katna gunta jy. va'o lo nu jy. boi fy. jibni gi ze'u lo jeftu be li su'o lo xance be jy. cu blucri
.i du'onai jy. boi py. ba'o cuxna lo xabju be lo cilce bei ze'u lo zmadu be lo nanca be'o falkono noi ja'aru'eku po'o tolcilce binxo kakne
.i ku'i lo bi'unai nanla cu troci mu'i lo nu se minde lo ri patfu kei .e lo nu se jgira be py. djica
.i pamai jy. ge ze'u stali fy. gi ge jai gau ranji lo barda fai lo fy. nuncikna gi ji'a zgicu'u fi fy .imu'ibo ti'e lo'e tatpi cipni cu tolcilcybi'ogaufilzma
.i remai jy. cilre fi lo cipni tutci .i .e'i jy. jai gau visnalka'e cei broda fai fy. gi'e mu'igi lo nu broda nardji gi na broda gi'e fi'o zilzu'e gi zutse bu'u lo se viska be fy ku po'o gi .a'o fy. lacri jy.
ni'o mu'igi jy. pu ctigau fi'o xance gi fy. na citka
.i bazaku jy. citka carmi seri'a lo nu katna jy. skapi
.i ku'i lo nanla no'u jy. gleki lo cabna mu'i lo nu zabna farvi .e lo nu djica lo nu lo cipni be selsau vo'a seja'eji'a lo nu .e'i fy. citka lo ciblu be jy.
.ije facki lo du'u fy. melbi kei joi du'u lo noi cinla vau nalci be fy. cu prije joi tsali
.ibosa'e ca lo nu fy. sfubu kei lo gusni fy. muvdu simsa
.i ji'a fu'emu'a ca lo co'i nu fy. cukla bo vofli je klama lo jy. xancidni kei jy. ja'aru'e gleki krixa
.i so'iroiku fy. plipe lo jy. janco gi'e muvgau lo moklu lo jy. kerfa fu'o
ni'o ge jy. je'a facki lo kampa'i fy. gi cagi jy. birti lo du'u tolcilce naje je'a tolcilre gi jy. klama lo paftu gi'e zgagau py. lo jy. terzu'e noi ba'a py. jgira
.i ku'isai jgira nagi'e ge jgari fy. noi tolcilce je lacri zi'o vau lo xance gi cnebo be fy. popygau
.i lu .i mi --sei py. cusku-- pu minde do lo ka tibgau lo cipni zo'u py. toljgari fy. noi loldi farlu
.i lu .i ku'i do jai te basti fi lo ka pamgau .i lo'e falkono cu na'eke prami ke danlu pendo gi'e tsali joi kusru .isa'e lo vi cipni zo'u se tolcilce naje spofu li'u
.i baku casa'e lo nu py. cliva jy. kei lo nanla cu klaku fi tu'a lo dalpe'o co'u lo nu py. minde lo selfu lo ka derse'a fy.
.ija'o jy. noroize'eba klaku gi'e ze'eba morji lo poi ka spogau kei joi ka se spogau ku'o se facki be jy. bei lo kampa'i

fa'o