Army

ATTENTION PLEASE !!!!!
#بوست_مهم_جداً
#شير_فى_الخير

البوست دا مُخصص للولاد إللى عندهم إعفاء من الجيش زى حالاتى فقط لا غير .. هقولكوا إزاى تتطلعوا الإعفاء بتاعت الجيش من الأول للأخر

يا ريت الناس تعمل شير للبوست دا عشان يوصل لناس كتيرة و يعرفوا ايه الورق المطلوب و كدا و كمان لو تعرفوا حد مالوش جيش اعملولوا منشن فى البوست دا أو حتى اعملوا save للبوست ممكن تحتاجوه قدام ..

الصورة دى من تجنيد الجيزة و فيها الورق المطلوب لإستخراج شهادة الإعفاء و هم

١- قيد عائلى كمبيوتر حديث الإستخراج
٢- شهادات ميلاد أخواتك
٣- بطاقة ٦ جند
٤- صورتين بطاقة لطالب الإعفاء
٥- صورتين بطاقة لوالد طالب الإعفاء
٦- لو انت سنك أقل من 21 سنة هتجيب حد يضمنك
٧- لو والدك متوفى هتجيب شهادة وفاة كمبيوتر

نمسك حاجة حاجة و هقولك بتطلع إزاى و منين و بكام و كل حاجة ..

١- قيد عائلى كمبيوتر حديث الإستخراج : القيد العائلى دا عبارة عن ورقة بتثبت إن أنت وحيد أو إن أنت والدك متوفى أو إن أنت مالكش أخوات ولاد حتى لو والدك متزوج أكتر من مرة و لازم يكون حديث الإستخراج يعنى مايكنش فات على إستخرجه 3 شهور لو فات عليه 3 شهور و يوم واحد بقا قديم و لازم تطلع واحد جديد .. بيطلع منين ؟؟ بيطلع من السجل المدنى اللى فى دايرتك أو اللى موجود فى دايرة سكنك يعنى مثلا عشان انا فى الهرم روحت السجل اللى عند كايرو مول فى شارع الهرم ..

بيطلع إزاى ؟؟ سيادتك هتروح السجل و معاك صور بطايق البيت كله يعنى والدك و والدتك و أخواتك و شهادات الميلاد بتاعتهم كلهم بردوا + وثيقة زواج أو طلاق للوالدين رسمية كمبيوتر و هقولكوا تحت بتطلع إزاى + طبعاً صورة بطاقتك و شهادة ميلادك بس لازم لازم تكون حديثة .. يعنى إيه شهادة ميلاد حديثة ؟؟ يعنى حضرتك هتجيب شهادة ميلادك اللى معاك لو لقيت مكتوب تحت خالص كلمة "الرقم الثلاثى" يبقى انت كدا فى السليم و مش محتاج تطلع شهادة ميلاد جديدة لو اللى معاك قديمة يعنى مش مكتوب تحت الرقم الثلاثى يبقى لازم تطلع واحدة جديدة من السجل المدنى بردوا عشان تعرف تطلع القيد ..

طب ازاى اطلع شهادة ميلاد حديثة ؟؟ هتروح نفس السجل و هتقف فى طابور مالوش أول من آخر 😪 لما توصل عند الشباك هتطلع بطاقتك و تقولهم عايز أطلع شهادة ميلاد حديثة هتستنى ٥ دقايق و هتطلع .. ينفع أطلع أكتر من واحدة ؟؟ اه براحتك حتى لو عايز 10 مافيش مشكلة .. هى الشهادة الواحدة بكام ؟؟ شهادة الميلاد الواحدة بـ 15 جنيه تقريباً ..

طلعت شهادة ميلادك الحديثة و معاك بطاقتك و صور بطايق البيت كله و شهادات ميلادتهم و كله تمام و خلاص هطلع القيد العائلى .. استنى ماتفرحش أوى كدا 😂 لازم مع الحاجات دى كلها تقدم وثيقة أو قسيمة الزواج أو الطلاق للوالدين كمبيوتر زى ما قلتلك فوق ..

بنطلع وثيقة الزواج أو الطلاق دى إزاى ؟؟ و أنت واقف على الشباك و طلعت شهادة ميلادك الحديثة اوعى تمشى من نفس الشباك هتقولهم عايز أطلع وثيقة زواج للوالدين هتديهم بطاقتك و يسألوك على اسم الأم و احتمال الجدة من ناحية الأم هتقولهم الأسامى دى و لو صح الست هتقولك تمام و فى دقيقتين هتطلعلك وثيقة الزواج أو الطلاق .. سعر الوثيقة الواحدة 25 جنيه تقريباً و ينفع تطلع أكتر من واحدة عادى بردوا ..

معاك شهادات الميلاد و صور البطايق و وثيقة الزواج أو الطلاق و كله زى الفل و عايز تطلع القيد العائلى بقا هتروح على شباك القيد و تقف فى الطابور و تستنى دورك و تديهم الورق دا كله و هيقلولك تعالى كمان أسبوع عشان تستلم القيد العائلى بتاعك تيجى بعد أسبوع تستلم القيد و كدا بقا معاك أول و أصعب ورقة من ورق شهادة الإعفاء ✅

٢- شهادات ميلاد أخواتك : دى بسيطة أوى هتجيب شهادات ميلاد اخواتك البنات و لو مالكش أخوات يبقى خلاص بس فى حاجة لو الأب متجوز أكتر من مرة و ليك أخوات بنات تانية من نفس الأب لكن من أم تانية أنت لازم تجيب شهادات ميلادتهم بردوا و كدا معاك تانى حاجة من ورق الإعفاء ✅

٣- بطاقة ٦ جند : و دى تعتبر بسيطة بردوا هتخرجها إزاى ؟؟ هتجيب شهادة ميلادك الحديثة و حط مليون خط تحت كلمة الحديثة دى زى ما قلتلك فوق و هتقدمها فى مكتب التجنيد مع صورة بطاقتك و ممكن تستلمها فى نفس اليوم أو اليوم اللى بعديه بالكتير و كدا يبقى معاك تالت حاجة من ورق الإعفاء ✅

٤- صورتين بطاقة لطالب الإعفاء "إللى هو حضرتك" 😂
٥- صورتين بطاقة لوالد حضرتك

و دول مافيش فيهم كميا ولا أى حاجة 😂 معاك كدا رابع و خامس حاجة من ورق الإعفاء ✅

٦- لو انت سنك أقل من 21 سنة هتجيب حد يضمنك : الناس اللى سنهم عدى الـ 21 سنة مايقروش الشرط دا اللى سنهم أقل يقروا بقا المفروض بعد ما جبت الورق دا كله و رايح تطلع الإعفاء بس انت سنك أقل من 21 سنة لازم تجيب معاك ضامن يضمنك لدى جهة التجنيد ممكن والدك أو عمك أو خالك أى حد مافيش مشكلة و لازم يكون معاه بطاقته طبعاً لو أنت لقدر الله مقطوع من شجرة و مالكش حد يبقى بتجيب أى موظف حكومى معاك يضمنك .. مش عجبك حوار الضامن دا خلاص استنى لما تكمل الـ 21 سنة و روح طلع الإعفاء لوحدك .. كدا دى سادس حاجة ✅

٧- لو والدك متوفى هتجيب شهادة وفاة كمبيوتر : لو أنت والدك عايش الحمدلله خلاص يبقى الكلام دا مش ليك لو لقدر الله والدك متوفى يبقى ركز معايا سيادتك هتروح نفس السجل المدنى اللى طلعت منه شهادة ميلادك الحديثة و وثيقة الجواز أو الطلاق و القيد العائلى و تروح هناك و تقولهم عايز أطلع شهادة وفاة كمبيوتر لوالدى هتديهم بطاقتك و لو معاك أى ورقة تُثبت إن والدك متوفى و هم هيتأكدوا إن الوالد متوفى و هيطلعولك شهادة وفاة كمبيوتر حديثة من عندهم و تقريباً بردوا بـ 25 جنيه .. كدا معاك سابع حاجة ✅

عاااااااااااش يا بطل كدا انت معاك كل الأوراق أو المستندات المطلوبة لإستخراج شهادة الإعفاء من الجيش هتروح على مكتب التجنيد الخاص بيك أو اللى موجود فى دايرة عنوانك فى البطاقة و تقدم كل الأوراق دى و هناك هتدفع مبلغ معين مش عارف كام بالضبط الصراحة و هيقلولك تعالى كمان أسبوع أو 10 أيام تستلم الإعفاء بتاعتك .. و احمد ربك إن مالكش جيش و مبروك عليك الإعفاء 🎉🎉💃😂

سؤال أخير مهم ممكن يجى فى بالكوا .. هو لازم أطلع شهادة الإعفاء من الجيش بعد ما أتخرج ولا ينفع أطلعها و أنا لسه طالب فى الكلية ؟؟ ببساطة هم مش بيحتاجه شهادة التخرج فى حاجة عشان تطلع الإعفاء بتاعتك و بالتالى أنت ممكن تطلع الإعفاء بتاعتك و أنت فى أى سنة من سنين الكلية عادى بنفس الشروط و الورق اللى قلتلك عليهم فوق ..

و لو حد عايز يسأل على أى حاجة فى موضوع الإعفاء دا يتفضل يسأل و أنا هجاوب عليه 💪💪 شكراً ☺️