Deutsch4mich

لو انت بتدرس في كليه لغات و بالتحديد ألماني ومحتاج تعرف سوق العمل في مصر لما تتخرج..

يبقى البوست ده تاريخي ...و لازم تعمله save عندك و تعمل share مع كل زملايك :D
(نفس الكلام لدارسين الاسباني والايطالي والفرنسي والانجليزي... او انت تخصص تاني لكن بتدرس ألماني برده عشان تشتغل بيه في مصر... )

اولا...لازم تعرف حقيقه علميه...ان مصر اكتر بلد ممكن تدرس فيها اكتر من 8 لغات بشكل محترف وتلاقي كمان شغل...و انا هنا بتكلم عن التعليم الأكاديمي للغات ديه او التعليم الخاص على هئيه كورسات لغه في مراكز اللغات.

ده خلى اكبر مستوعب لشباب خريجين اللغات هوه الشركات المستثمره في مجال
ال Call Center ...
و ال call center هوه عباره عن شركات كبيره...متنوعه...محتاجه دعم فني او خدمه عملاء...
و اكبر مثال على كده شركات كبيره...زي Yahoo! و Skype كان الدعم الفني ليهم هنا في مصر...:)

بس الوضع مختلف حاليا...اتقانك للغه لوحده مش كفايه ....70% من الفرص اللي موجوده
واللي مرتباتها مجزيه...
بيتطلبوا انه يكون عندك Technical –Background..و كل ماتكون متخصص اكتر بجانب اللغه....كل ما المرتب هيزيد اكتر...طيب تتعلم ده ازاي؟ هنشرحه في آخر البوست..لكن الأول خلينا نشرح التالي:

- اتقان اللغه
- اكبر الشركات ال Call center & Technical support في مصر.
- متوسط المرتبات اللي بتعرضها الشركات مع المزايا الأخرى
- جروبات وظايف لمتحدثي الألمانيه.
- مجالات اخرى : تدريس – سياحه – ضيافه.
- كيفيه التعلم و الدخول في مجال ال Technical.
-----------------------------------------------------------------------------------------
اتقان اللغه:

- لو انت لسه في كليه لغات يبقى لازم تعرف ان في اساطير ملهاش اساس من الصحه
انت من السن يعني مترجم/ انت من تربيه يعني مدرس / انت من ادآب يعني هتطلع اديب!...
صدقني انا من المستقبل و بقولك مفيش الكلام ده! :D

- لو عايز تشتغل في مكان محترم بمرتب كويس...يبقى لازم تحط في دماغك ان لغتك هيا اللي هتشغلك...
يعني لازم تكون قوي جدا فيها...و صدقني تعليم الكليات ديه و لا حاجه...انا كان معايا ناس اوائل الدفعه و مش عارفين يقدموا نفسهم في الانترفيو ...

- الحل ان تاخد كورسات في اللغه من و انت في سنه اولى...في لغتك الأجنبيه و كمان في الانجليزي...و حط لنفسك هدف انك لما تتخرج من الكليه لازم يكون مستواك لا يقل عن C1...

- مش معنى انك درست كورس في مركز او حتى لوحدك ووصلت مثلا لمستوى B1 يبقى انت كده متمكن منه... لأ انت لازم تمارس اللغه...و ده عن طريق انك تسمع و تقرأ قصص للمستوى اللي انت فيه...مسلسلات و افلام...مواقع تبادل اللغات...و لو عايز امثله تفيدك ممكن تشوف الرابط على الجروب الجميل ده:

https://www.facebook.com/photo.php…

- لو عرفت تتعلم مهارات Technical كل ده هيبقى في مصلحتك و يرفع من سعرك...وصدقني في كنز حقيقي للموضوه ده ببلاش و مشروح بالعربي على Youtube وهشرحه في آخر البوست.
-----------------------------------------------------------------------------------------

- اكبر الشركات ال Call center & Technical support في مصر.
و متوسط المرتبات اللي بتعرضها الشركات مع المزايا الأخرى

#Raya /Sykes

شركه رايه و وشركه سايكس من شركات Call center & Technical support :

- المرتب: بدايه من 3500 حتى 6000
- Technical –Background : يشترط في 80% من الوظائف المعروضه
- مستوى اللغه: B2 –C1
- اللغات: الماني/انجليزي/اسباني/ايطالي/فرنسي
- مميزات أخرى: تأمين صحى و مواصلات
----------------------------------------------------------------------------------------
#Vodafone

شركه فودافون من الشركات اللي بتقدم خدمه عملاء فقط و ماركيتنج باللغه الألمانيه.
-المرتب: من 2800 ل 4200
Technical –Background : لا يوجد
- مستوى اللغه: B2 –C1
- اللغات: الماني/انجليزي/ايطالي
- مميزات أخرى: تأمين صحى و مواصلات
-----------------------------------------------------------------------------------------

#IBM
من الشركات اللي بتشتغل في Call center & Technical support
- المرتب: من 2800 ل 8000
- Technical –Background: يشترط في 80% من الوظائف المعروضه
- مستوى اللغه: B2 –C1
- اللغات: الماني/انجليزي/ايطالي/اسباني/فرنسي
- مميزات أخرى: تأمين صحى و مواصلات
-----------------------------------------------------------------------------------------

#EMC
من الشركات اللي بتشتغل في Technical support
- المرتب: من 6000 ل...^^
- Technical –Background: يشترط في 100% من الوظائف المعروضه مع الخبره
- مستوى اللغه C1-C2:
- اللغات: الماني/انجليزي/ايطالي/اسباني/فرنسي
- مميزات أخرى: تأمين صحى و مواصلات
----------------------------------------------------------------------------------------

#SQS

شركه مجالها مختلف...و هوه Software testing
- المرتب: من 3500
- Technical –Background: يشترط في 80% من الوظائف المعروضه
- مستوى اللغه: B2 –C1
- اللغات: الماني
- مميزات أخرى: تأمين صحى
-----------------------------------------------------------------------------------------
مجالات اخرى للغه الألمانيه : تدريس – سياحه – ضيافه.

التدريس في مصر نوعين: تدريس في مدارس او تدريس في مراكز لغات.

تدريس مدارس الحكومه مرتباته ضعيفه...و كمان مستوى اللغوي للمدرسي هناك ضعيف..من A2 ل B1
مدارس تجريبي: نفس ما سبق
مدارس خاصه : المرتبات من 2500
مدارس دوليه: المرتبات بدايه من 4000 مع شرط اتقان اللغه الانجليزيه عشان ديه اللغه اللي هتشرح بيها

تدريس في مراكز اللغات...و بيقى مطلوب مستوى لغه عالي ..و ده الأفضل:
الأجر بيكون بالساعه...و بيبتدي من 50 جنيه للساعه لحد 100 في الساعه

** في ناس كتير متمكنه في اللغه بشتغل في شركه من الشركات الي اتكلمنا عليهم فوق و ايام الاجازه بيشتغلوا
Part time في مراكز لغات.
** ممكن تلاقي فرص ليك في السياحه و الضيافه...لكن منصحش بيهم ( سوق مرهق ومتقلب)
-----------------------------------------------------------------------------------------

من جروبات الوظايف لمتحدثي الألمانيه:

https://www.facebook.com/groups/Stellenangeboteinaegypten/1-

https://www.facebook.com/groups/417025395044374/2-

-----------------------------------------------------------------------------------------
كيفيه التعلم و الدخول في مجال ال Technical

مجالات Technical كتير جدا...لكن اكتر التخصصات المطلوبه :
- Linux and Unix
- Networks
Programming-

الجدبر بالذكر...انك عشان يكون عندك الأساسيات ...لازم تذاكر كورس A+
وده كورس كامل مشروح بالعربي بشرح مبسط من المهندس احمد جوده :
https://www.youtube.com/watch…

- Linux :
من اكتر الناس اللي حتحببك في اللينكس المهندس مصطفى حموده:

https://www.youtube.com/watch…

Programming &: Networks

القناه ديه على Youtube كنز حقيقي...لشرح مهندسين مصريين لكورسات IT في مجالات كتير جدا:
https://www.youtube.com/user/Nourelhoda2011/playlists

ملاحظات:
- الشرح اللي فات هدفه اناره الطريق امام الطلبه في كليات اللغات تحديدا...و عشان يستغلوا وقتهم في الكليه و يشتغلوا على نفسهم صح.

- مش شرط تكون خريج لغات عشان تشتغل في اي حاجه ليها علاقه باللغات...ممكن تكون مهندس او دكتور بتتكلم لغه كويس ...و هتلاقي ده كتير.

- مجرد اتقانك للغه بيفتحلك مجلات كتير...اشتغل على نفسك و مضيعش وقتك.

- بالتوفيق للجميع...ونسألكم خالص الدعاء