Hamoiij quij, ziix iti cöipacta quih pac haa ha.
Hantx cömiiha hac, hamoiij tiquij comcaaccmajiic z imacaalam, yoocyo.
Pyeest mos z ano pahcaalim ta, ipacta z impaa ha. Xiica coosyatoj hapáh tacoi, ihiimotoj íi, yoocyo.
Hanso ziix caziim quih pohaa ta, cöspacta ha quih oo cötpacta ma, yacaalam iha. Xiica tacoi iisax quihiih cah ziix isahii ha z iti cöiimj iha yax, xtaasitoj yaat xaha, hanso hant iti yaii xaha, hant ano heecot yaiitoj xaha, coox oo iti cöteept, yoque.
Hansaa hax xiica iihjoj áa com max, mos iti cöteept teeme, ítolcoj xaha, imjöc xah, hapezi quih haa tiij ma x, taax oo iti ito xaha, imoz quih hapx cöiha-caaix teeme.
Hantx cömiiha hac quiimotoj coi coocj cah ptiicp inyai iiha.
Cmaax hoox cöiiha hizac pyeest cah ano mahcaalim iiha.
Comcaac cmajiic quih halx tatàxo x, cö-miimotoj.
Ool itac quih tpacloj, hax tpeetilc oo ma x, cooitom cah iij iiqui pte tpácamam x hant hapeetij quij toii cömahaafin.
Ox tpacta ma, hapéxeca coi mos toc cömoii. Taax hamisj cah ano tpeemjöc, ziix cötahnaxca, hateiicloj iiscax quih cötahcópxatol ma x, caalam coi iij caap tazo cah, xiica tacoi z imiixz.
Hehet taax ah hapéxeca mpáh.
Ox tpac-ta ma x, cmajiic tacoi ha zo toc cötiij x, hax quih ít hapáh hac imacoxl.
Hant hapeetij tiquij quinej halx caaiàl quih iti tahaahca ma x, hant taax ah hax quih ít impáh.
Hanso pyeest quih thaa ma x, cmajiic tacoi hax zo haa xah tiij x, imacoxl, xo xiica cmotómanoj pyeest hant cöhacaaix xah, hapaatim xah, haat hanoohcö caacoj pyeest hant cöhacaaix xaha, taax cmajiic catootam coi haa zo toc cötiij x, hax quih ít hac imacoxl.
Quiimotoj coi tcooo x, ziix quih cömeept, hateen ihaaihjö xah, hasít xah, taax cmis cah cömeept. ox tpacta ma, hamoiij quij ano queeyela coi mos toc cömoii.
Hapaatim quih thaa ma x, pyeest quij caaizi quih tcooo x, hamoiij quij ano meeyela.
Camoiilcoj coi tcooo x, ziix quih cömeept, xo hamoiij quij ano queeyela hapáh coi taax teezitoj xox imexaj iha. hax quih ít hac cacoxl quij ah, hamoiij quij miizj hant imiixquim.
Hantx cömiiha hac ha-moiij quij hásatoj cah oo cötpáh, yoocyo. ool itac quih oo cöipáh hac taax halx cmaa quiih iha.
Xo pyeest quij hant cöiyaail quih ano cöitcmitai ma x, mos hast cah oo compáh.hapaxcaj coi mos toc cömoii.
Taax xapij cah íti tahcascax x, miizj hant tpacmoj x, cheel xah, cooil xah, taax cötahnaxca ma x, hapaxcaj quih mhaa. hapaxcaj coi iij coiitoj quij capxa ha.
Tapxa ziix cöimahnaxz hac hant cötoii ma x, mahanl, tcooo toospoj ma x,mazooxolcam.
Coocj toospoj ma, tazo ziix cöimahnaxz hac hant cotom ma x, mahaapxa, coocj ziix cötmahnaxca ma, tazo toospoj ma x, ihít iiqui quiin impáh.
Ox tpacta ma x, cmaax siimotoj ca quih hant zo cötoii x, coox oo hapéxeca coi imiixajoj.
Hax quih ít hac cacoxl quij ah cötootni íi ma x, cmaax ihmaa coi imaaizi.
Quiimotoj coi hant táhajca x, hant hapeetij quij toii imiifin.
Ox tpacta ma x, cötootni ma x, iixz com mahcaatax, hanso ihít oo iiqui tiin ma x, iic cöquiij quij imaai.
Ihít iiqui tiin ma x, iixz com ihít iiqui mahqueetx.
Hax quih ít hac cacoxl quij an ihimoz quih iti cöiiha ha yax, tiix ocoho cah mhaa.
Cöcootni quih toc cötiij x, hant hapeetij quij toii itafin x, cmaax cooitom quih cocooix coox cah x, imiicö.
Comcaac quih halx anàxö iqueezitoj quiyaj iha. cmiique tazo teezi ma x, ano yaii cöcajöc impáh.
Pyeest quih hant zo cötiij ma x, zaah iti cöihiyat quih thaa ma x, hamoiij quij hant icaaitajc tzooxöc x, cöihitooij mazooxolcam.