DAAD

كيفية الحصول على منحة ال DAAD
بوست مهم جداً ل Ali El-deeb
قبل ما أدخل في الكلام عن الشروط حابب أوضح شوية معلومات مش موجودة في الفديوهات :
المنحة دي عبارة عن كورس لغة لمدة شهر في ألمانيا.
اللي بيقبل في المنحة بيسافر في الصيف مش دلوقتي.
المنحة بتقدملك 1500 Euro في الغالب بيقضوا مصاريفك ، بس الفلوس مش هتاخدها غير في ألمانيا لما تسافر فهتبقي مضطر تسافر علي حسابك.
المنحة بتوفرلك الكورس اللي هتاخده سواء في جامعة أو معهد لغة + السكن ( ممكن تسكن في مكان تبعك وتاخد مصاريف السكن انت) وبس يعني أكلك شربك مصاريفك عليك.
بتقدم علي المنحة وبتتواصل مع ال DAAD من خلال موقع اسمه DAAD PORTAL بتعمل إيميل عليه.
معايير القبول في المنحة دي حاجة تخص ال DAAD بس انت بتسعي بكل طريقة إنك تعمل الورق صح.
إيه بقي الورق اللي لازم أعمله صح ؟ 😃
هقولك ياسيدي
1- شهادة الثانوية مترجمة للغة الألمانية أو الإنجليزية.
الشهادة ملهاش تأثير كبير في موضوع القبول يعني اللي جاي أهم منها بكتييييييير. بس ده ميمنعش إن لو مجموعك حلو هيبقي حاجة كويسة بردو  😃
2- إثبات قيد من كليتك بردو مترجم انجليزي أو ألماني.
طبعا مفهوم إنها ورقة روتينية 😃 علشان يعرفوا انت في كلية ايه في سنة كام وبتدرس إيه طبعا.
3- بيان درجات من الشؤن لو انت في 3 هتجيب بيان ددرجات ل 1 و 2 ولو لسه في سنة تانية هتجيب بيان الدرجات بتاع سنة أولي ( شباب الأزهر : شهادة تمهيدي ملهاش لازمة ها)
4- استمارة للمنحة بتملاها ودي مش محتاجة شرح ولا حاجة بتنزل الاستمارة وبتملي كل الخانات المطلوبة منك.
5- شهادة B1 معتمدة من معهد جوتة أو من Ädk أو تدخل امتحان ال DAAD اللي بتحجزله من ال DAAD Portal بتاعك ( في بوست مخصوص عن الامتحان ده لأنه محتاج شرح )
6- Motivationsschreiben
وده تقريبا أهم حاجة مطلوبة منك ولازم تركز عليه جدا وتعمل بالنصايح اللي هؤلهالك في بوست كامل عنه ( في فديو اتعمل بالفعل بس هنعيد الكلام في بوست)
7- Lebenslauf / CV
بتملى في ال cv بتاعك بياناتك الشخصية وبعض المعلومات التقليدية وبعض المعلومات التانية اللي مش تقليدية 😄 ودي بردو هعملك عليها بوست.
8- Gutachten
وده بنقول عليه بالعربي ( خطاب توصية ) بيعمله ليك أحد الدكاترة بتوعك بشرط يكون درسلك ولو مادة واحدة.
س : ليه مقولتش كل المعلومات في بوست واحد وخلصتنا ؟
ج : سؤال محترم عملت كده علشان لوقولتلك كل المعلومات في بوست واحد عمرك ماهتقدر تفتكرها كلها لكن واحدة واحدة كده المعلومة هتعيش في دماغك من غير لبس ، دي وجهة نظري 😃
ياريت لو شايف إن البوست ده مفيد اعمله شير ومنشن لأصحابك وخليك سبب في مساعدة وسعادة غيرك.
والسلام عليكم ورحمة الله وبركاته 😄