Hoi zäme :D

Falls für jemanden Mundart absolut unverständlich ist, bitte einfach melden, dann werde ich die Sprache wechseln

Ihr hend euch für s Buddy-Programm agmeldet und sind mir (Fabian Sigrist, 26i, ± im Master, vo Windisch AG) zuegwise worde. Das beinhaltet mehreri Sache, wo ich im folgende «churz» (sorry 😂) wird umriisse:

*Mittwuch, 10. September; EST*
Mir treffed eus morn nach em offizielle Teil vom Erschtsemestrigetag (EST). Euse genaui Treffpunkt wird ich euch no mitteile. Ich zeig euch denn die wichtigschte Ort, d Bibliothek, die verschiedene Zmittag-Optione und beantworte euchi erschte Fragene. Eusi Tour wird bide zwei Hauptmense ende. :)

*Wie erkenned ihr mich morn*
Grundsätzlich hend alli vom Buddy-Programm morn es wisses T-Shirt aa. Da s aber morn vorussichtlich ned blaue Himmel git: Ich wirde bi Rege vermuetli en grüeni Helly Hansen-Regejagge aha und beigi (?) Chino-Hose, ich bin dunkelblond und ned ganz de gröschti.

*Während em Semeschter*
Einersits wird ich euch witerhin via WhatsApp zur Verfüegig stah, falls organisatorischi Frage uftauched. Fraged eifach ungeniert, s git wük kei blödi Fragene (wükli, es isch d UZH, isch echt chli chaotisch mengisch!). Am beschte natürli da ide Gruppe, aber au mir privat isch natürli okay. Ich bin grundsätzlich ned defür da, euch inhaltlichi Frage z beantworte, aber vilich chan ich euch witerhelfe, wo naafrage/wer die richtig Person isch zum frage.

*Physischi Treffe*
Mir hend es Budget für alli vo euch wo guet langet zum 2-3 Mal öpis z unterneh. S erschte Mal wird vermuetli zwüsche Mitti 1. und Mitti 3. Wuche stattfinde. Öpis go trinke ide bQm-Bar bide Uni/ETH, en Pizza bstelle sind Bispil für chlini Events. Ich wird euch de no rechtzitig frage, was euch für Termine gönd. :)

*Witeri Mitglieder*
Falls ihr Lüt kenned, wo no kein Gruppe hend, dörfeder sie selber hinzuefüege, ihne säge, dass sie mir dörfed schriibe oder mir ihri Telefonnummere schicke. 👍🏼

*Wiiteri Links/Adressene/Infos für de Start*
- Infos für Erstis vom VSUZH: https://t.uzh.ch/1KK
- Psychologische Beratungsstelle UZH: https://t.uzh.ch/1KL
- Mental Health ➡️ Mindful[L] (z.B. ADHS-Kafi): https://t.uzh.ch/1KM
- Nachteilsausgleich (NTA), z.B. 25% Extra-Zeit/separater Raum: https://t.uzh.ch/1KN
- Fachverein Jus: https://fvjuris.ch/
- Reservation RWI-Bibliothek: https://t.uzh.ch/1KP
- Bücher-Recherche: https://uzb.swisscovery.slsp.ch
- Mit VPN/Uni-WiFi digitaler Zugriff Basler-Kommentare: https://legalis.ch
- Wener weg Login-Problem (oder susch) kei Zuegriff uf Juristischs Arbeite hend, melded euch bim Lehrstuehl wo das Jahr defür zueständig (letscht Jahr isches de Lehrstuehl Griffel gsii [[email protected]]).
- Bi Problem mitem Mensa-Bon: [email protected]
- Bi allgemeine IT-Problem: [email protected]

Fallsers bis da abe gschafft hend, Huet ab und bis morn! :D