Haudis Teigaffägratin



Zuetate für 4 Personä (oder ei Haudi):

- 400g Rindshack

- 500g Teigaffä (Aüplermaccaroni si super)

- 2dl Rotwii (Am beschtä es Fiasco choufä, de machts gad viumeh Spass bim choche)

- 200g Rüebli

- 200g Broccoli

- zwe Stange Louch

- 2dl Haubrahm

- 2dl Bouillon

- zwe gäbigi Zibele

- Chli Pfäffer, Sauz, Paprika, und ganz wichtig griechischi Chrütermischig

- Chli Ketchup (mou ehrlech, huere fein)

- Soviu Chäs wime gärn het - i nime 200g Greyerzer (ou fein)



Zuebereitig isch, wär häts dänkt, so bubi eifach das sogar i das cha......



Auso zersch nimmtme es 2dl Glas u füut das mit Wii - när suuftme das us.... Sehr wichtig, süsch chunts nid guet....



När aues chliischnipple - je chliner desto besser.....

Wasser fürd Teigaffe ufsetze.....

Bratpfanne heiss mache und öu ine.....

Zibele drii und abrate

Fleisch drzue und ou abrate und di chosä würzä mit däm woni da obe xeit ha

När z Gmües ine (grössers zersch)

Ketchup derzue (nume sone Schprutz)

schön chli brätle....när ablösche mit Bouillon und Wii oder ou nume Wii ;)

Chli la witerchöcherle bis die gwünschti Konsischtänz erreicht isch.

Rahm drii und fertig. (Pfanne furt vom Herd du Depp, süsch wirds garusig)



Das Züüg mitde Teigaffe mische und ab i die buttereti Form u när schöön mit ordli Chääs zueschütte.



Iz nomau es Glesli Wii suufä (mhhh fein) u eventuell eis röiklä (o guet)



Dä Unfau schiebtme när eifach bi 220°C i vorgheizt Bachofä u laht das dert 20-30 Minutä la brünierä.....



Drzue chame es Salätli mampfe oder ou nid.....



Wär irgendöpis vo däm Chabis woni da ha xeit nid gärn het, cha eifach ustuusche winer wot (Vilech nid gad Louch mit Snickers tuusche), die Katastrophe chame ou mit Poulet machä......