نزعل ونتكبر واحنا من الطين
والكل منا يصد لاقابل خويه
نفخر نقول إنا على الصد قاوين
وهي علينا في الحقيقه قويه
ننسى نهايتنا وعلى وين ماشين
وننسى الزمان اللي جمعنا سويه
المشكله ماهي بحاجه لتخمين
ولاهي ياناس صعبه القضيه
دق الرقم كيفك هلا فيك وأهلين
أنا الخوي اللي مزعل خويه
تغيب وصورتك داخل العين
ويبقى لحبك في خفوقي بقيه
أخوان احنا لو يجي بيننا شين
مانفترق ودرب المحبه نديه
خلك قوي لاتحتكرك الشياطين
قبل الفوات وقبل وقت المنيه
هذه هي الدنيا من الحين للحين
لابد بين الناس تحصل خطيه
ومن لايقدر غلطة أحبابه الحين
يقرا حروفي ويعتبرها هديه
باكرتمر سنين وسنين وسنين
والكل يرحل في الدروب المديه
صدقني تندم واذكر حروفنا زين
تندم على خويك إذا غاب ضيه