Not a member of Pastebin yet?
Sign Up,
it unlocks many cool features!
- ആശുപത്രി
- ─────────────────────────────────
- അഞ്ചാം നമ്പര്‍ വാര്‍ഡ്
- ─────────────────────────────────
- അഞ്ചാം നമ്പര്‍ വാര്‍ഡിലൂടെയാണു്
- ഭൂമദ്ധ്യരേഖ കടന്നുപോകുന്നത്.
- ഇവിടെയിരുന്ന് രോഗി
- ഉഷ്ണമേഖലയും ശീതമേഖലയും കാണുന്നു.
- മുറിച്ചു മാറ്റപ്പെട്ട ഒരു ചെവിയാണ് ഈ മുറി.
- ഇതിലൂടെ അവന്‍
- നിലവിളികളും പൊട്ടിച്ചിരികളും കേള്‍ക്കുന്നു.
- മണല്‍ക്കുന്നു കയറാന്‍ വിധിക്കപ്പെട്ട തടവുകാരെപ്പോലെ
- അവന്റെ കുഴഞ്ഞ ചിന്തകള്‍
- വീണ്ടും വീണ്ടും മനസ്സില്‍ പിടിച്ചുകയറുന്നു.
- അഞ്ചാം നമ്പര്‍ വാര്‍ഡിലെ രോഗി ഉറങ്ങുന്നില്ല.
- അവന്റെ താപനിലയുടെ ചാപല്യങ്ങള്‍
- ഡോക്ടര്‍മാര്‍ക്കും മനസ്സിലാക്കാന്‍ കഴിയുമെന്നു തോന്നുന്നില്ല.
- ഒരു നിമിഷം അവന്‍ അരയാല്‍ത്തണലിലിരുന്ന്
- സംസാരദുഃഖങ്ങളുടെ കാരണം തിരക്കുകയാണ്
- അടുത്ത നിമിഷം അവന്‍ ഒരു നീഗ്രോവിപിനത്തില്‍
- സ്വേച്ഛാധിപതികള്‍ക്കെതിരായ
- ഗൂഢാലോചനയില്‍ പങ്കെടുക്കുന്നു
- അവന്റെ ഹൃദയത്തിന്റെ വലതുഭാഗം ഒലീവിന്‍ കുന്നില്‍
- പാനപാത്രം തിരിച്ചേല്പിക്കുകയാണ്
- ഇടതുഭാഗം അപ്പോള്‍ ഒരു സ്പാനിഷ്‌താഴ്വരയില്‍
- ഫാസിസത്തിന്റെ വെടിയുണ്ടയേറ്റു ചോരയൊലിക്കുന്നു.
- ഇപ്പോള്‍ അവന്‍ മേരുവിന്റെ ഗുഹയിലിരുന്ന്
- ലോകത്തെ മുഴുവന്‍ സ്നേഹിക്കുവാന്‍ പഠിക്കുകയാണ്
- ഇപ്പോഴിതാ പെറൂവിയന്‍ രാത്രിയിലിരുന്ന്
- സാമ്രാജ്യത്വത്തിന്നെതിരെ തോക്കു നിറയ്ക്കുന്നു.
- ഇന്ത്യയിലെ ഖനിവേലക്കാരോടൊപ്പം
- കല്‍ക്കരി കോരിക്കഴിഞ്ഞ് അവന്‍
- ഒരു മംഗോളിയന്‍ വസന്തനൃത്തത്തില്‍
- ഗ്രാമീണരോടൊത്തു ചുവടുവെയ്ക്കുന്നു
- അങ്ങിനെയാണവന്‍ ഇടയ്ക്കിടയ്ക്കു വിയര്‍ക്കുന്നത്.
- കത്തിമുനയിലൂടെ നടക്കുമ്പോഴെല്ലാം
- ആനന്ദത്തിന്റെ രഹസ്യമെന്താണെന്ന്
- അവന്‍ സ്വയം ചോദിച്ചിട്ടുണ്ട്
- കൗമാരപ്രണയത്തിന്റെ അസംസ്കൃത സംഗീതമാണോ
- അവിഹിതവേഴ്ചയുടെ ഭീതിനിറഞ്ഞ
- രഹസ്യസംതൃപ്തിയാണോ
- ഇണയുടെ അടിവയറ്റില്‍ സ്വന്തം നിഴലിന്റെ
- സ്പന്ദനത്തിനു ചെവിചേര്‍ത്തുള്ള കിടപ്പാണോ
- ശ്മശാനത്തിലുമൊതുങ്ങാത്ത
- തൃഷ്ണയുടെ നിരന്തര ജ്വലനമാണോ
- മമതയെന്നു മനുഷ്യര്‍ ഓമനപ്പേരിട്ട
- കൊച്ചുകൊച്ചു സ്വാര്‍ത്ഥതകളാണോ
- സമ്പത്തെന്നു തെറ്റിദ്ധരിക്കപ്പെട്ട നാണയങ്ങളുടെ
- വഞ്ചിക്കുന്ന തിളക്കമാണോ
- സ്ഥാനലബ്ധികളുടെ ക്ഷണികാഹങ്കാരങ്ങളാണോ
- സ്ഥിതപ്രജ്ഞന്റെ നിഷ്കാമകര്‍മ്മത്തിന്റെ
- യശസ്സാണോ
- ജന്മങ്ങളും വാസനകളുമവസാനിച്ച ആത്മാവിന്റെ
- അന്തമറ്റ രാത്രിയാണോ?
- ആനന്ദത്തിന്റെ രഹസ്യമെന്താണെന്ന്
- അവന്‍ സ്വയം ചോദിച്ചിട്ടുണ്ട്.
- മൂടല്‍മഞ്ഞുവീണ ആകാശം നോക്കി അവന്‍
- നോക്കും വാക്കും മനസ്സുമെത്താത്ത
- പൊരുളിനെക്കുറിച്ചു ചിന്തിച്ചു നോക്കിയിട്ടുണ്ട്
- എന്നാല്‍ അവനു ബ്രഹ്മസാക്ഷാത്കാരം കൈവന്നില്ല
- ബന്ധങ്ങള്‍ അവനു സമ്മാനിച്ചത് ദുഃഖം മാത്രമായിരുന്നു
- അവന്‍ സ്നേഹിച്ചവര്‍ മറ്റാരേയൊ സ്നേഹിച്ചു
- അവനെ സ്നേഹിച്ചവര്‍ അവന്റെ സ്നേഹം കിട്ടാതെ മരിച്ചു
- അവന്‍ എപ്പോഴും താന്‍ എന്തായിരുന്നുവോ
- അതല്ലാതാവാന്‍ കൊതിച്ചു
- കുറെക്കാലം അവന്‍ മരിക്കുന്ന മനുഷ്യന്റെ
- വിധിയോര്‍ത്തു കരഞ്ഞു
- പിന്നീട് ജീവിക്കുന്ന മനുഷ്യരുടെ
- വിധിയോര്‍ത്തു ക്ഷോഭിച്ചു
- വഴികാട്ടുന്ന നക്ഷത്രങ്ങള്‍ പൊലിഞ്ഞുപോയതറിഞ്ഞ്
- അവനിപ്പോഴും കഥയിലെ മരങ്കൊത്തിയെപ്പോലെ
- മുങ്ങാത്ത കപ്പലിനു പറ്റിയ മരം തേടി
- മരത്തില്‍നിന്നു മരത്തിലേയ്ക്ക് ചാടിച്ചാടി നടക്കുന്നു
- കൊത്തിക്കൊത്തി നടക്കുന്നു.
- ─────────────────────────────────
Add Comment
Please, Sign In to add comment
