Sora Mido

Sora Mido (karya Djaga Depari)

Terbegi sora bulung-bulung erdeso
I babo makam pahlawan si lino
Bagina sora serko medodo
Cawir cere sorana mido-ido

Terawih dipul meseng kutanta ndube
Iluh si lumang ras simbalu balu-balu erdire-dire
Sora ndehereng perenge-renge ate
Kinata ngayak-ngayak merdeka ndube

Makana tangarlah si ngelem layar-layar
Ula kal merangap ula dage jagar-jagar
Kesah ras dareh ndube tukurna merdekanta enda
Ula lasamken pengorbanan bangsata

Enggom kap megara lau lawit ban dareh simbisanta
Enggom megersing lau paya-paya ban iluh tangista
Enggom kap megelap langit ban cimber meseng kuta ndube
ngayak-ngayak merdeka kal kita

Tegu me dage temanta si enggo cempang
Didong kal dage anak-anak tading melunang
Keleng ate ras dame sisada karang
E me pertangisen kalak lawes erjuang

Terbegi sora bulung-bulung erdeso
I babo makam pahlawan si lino
Bagina sora serko medodo
Cawir cere sorana mido-ido