Advertisement
Not a member of Pastebin yet?
Sign Up,
it unlocks many cool features!
- Fraeye historie ende al waer
- Mach ic u tellen, hoort naer.
- Het was op enen avontstonde
- Dat karel slapen begonde
- Tengelem op den rijn.
- Dlant was alle gader sijn.
- Hi was keyser ende coninc mede.
- Hoort hier wonder ende waerhede
- Wat den coninc daer ghevel,
- - Dat weten noch die menige wel -
- Tenghelem al daer hi lach,
- Ende waende op den anderen dach
- Crone draghen ende houden hof,
- Om te meerderen sinen lof.
- Daer die coninc lach ende sliep,
- Een heilich engel aen hem riep,
- So dat die coninc ontbrac
- Biden woerden die dengel sprac.
- Ende seyde: "Staet op edel man.
- Doet haestelic u cleeder an.
- Wapent u ende vaert stelen.
- God die hiet mi u bevelen,
- Die in hemelrike is here.
- Of ghi verliest lijf ende eere.
- En steeldi in deser nacht niet,
- So is u evel geschiet.
- Ghi sulter omme sterven
- Ende uwes levens derven,
- Eer emmermeer scheit dit hof.
- Nu verwacht u daer of
- Vaert stelen of ghi wilt.
- Neemt uwen speere ende uwen schilt.
- Wapent u, sit op u paert
- Haestelic ende niet en spaert."
- Dit verhoorde die coninc.
- Het docht hem een vreemde dinc,
- Want hi daer niemant en sach,
- Wat dat roepen bedieden mach,
- Hi waendet slapende hebben gehoort,
- En de hilt hem niet an dat woert,
- Ende quam in ander ghedochte.
- Die daer die boetscap brochte,
- Dengel die van gode quam,
- Sprac ten coninc als die was gram:
- "Staet op karel ende vaert stelen.
- God hiet mi u bevelen
- Ende ontbiedet u te voren.
- Anders hebdi u lijf verloren."
- Met dien woerde sweech hi.
- Ende die coninc riep: "ay mi!"
- Als die seere was vereent,
- "Wat ist dat dit wonder meent?
- Ist alfs gedrocht dat mi quelt
- Ende dit grote wonder telt?
- Ay, hemelsche drochtijn,
- Wat node soude mij sijn
- Te stelen. Ic ben so rike.
- En is man in aertrijcke,
- Weder coninc noch graven,
- Die so rijc sijn van haven,
- Si moeten mi sijn onderdaen
- Ende te minen diensten staen.
- Mijn lant is so groot.
- Men vint nyewers sijn ghenoot.
- Dlant is algader mijn
- Tot colene opten rijn
- Ende tot romen voort,
- Alst den keyser toe behoort.
- Ic ben here, mijn wijf is vrouwe,
- Oest totter wilder denouwe
- Ende west totter wilde see.
- Nochthans heb ic goets veel meer.
- Galissien en spandien lant,
- Dat ic selve wan mitter hant,
- Ende ic die heydene verdreef,
- Dat mi tlant alleene bleef.
- Wat node soude mi sijn dan,
- Te stelen, ellendich man?
- Waer om ontbiedet mi dit god?
- Node brekic sijn ghebot,
- Wistic dat hijt mi ontbode.
- En mochts niet gheloven node
- Dat mi god die lachter onste,
- Dat ic te stelen begonste."
- Daer hi lach in dit ghepeins
- Harentare, weder ende gheyns,
- So vaecte hi een luttelkijn,
- So datti looc die oghen sijn.
- Doe seide dingel van te voren:
- "Wilde gods ghebot verhoren,
- Heer conicnc, so sidi ontdaen.
- Het sel u an u leven gaen."
- Dengel vanden paradise
- Sprac: "coninc doet als die wise
- Vaert stelen ende wert dief,
- Al hebdijs nu groot ongerief,
- Het sal u namaels wesen lief.
- Met deser talen voer dengel dan,
- Ende karel hem tseynen began,
- Vanden wonder dat hi hoorde.
- "Gods ghebot, sine woerde
- En wil ic niet laten achter.
- Ic sel dief wesen al ist lachter,
- Al soudic hanghen bider kelen.
- Nochtan haddic liever vele,
- Dat mi god name ghemeene,
- Dat ic van hem houde te leene,
- Beyde borch ende lant,
- Sonder mijns ridders ghewant,
- Endi ic mi moeste gheneeren
- Mitten schilde ende metten speere,
- Als een die niet en heeft,
- Ende op die avonture leeft.
- Dat ware mijn wille bet
- Dan ic ghevanghen ben int net,
- Ende ic nu moet stelen varen,
- Sonder eenich sparen.
- Varen stelen oft god verwercken.
- Nu so moetti mi gestercken.
- Ic woude, ic ware uuter sale
- Sonder nieumare ende tale,
- Ende mi waer ghecost opten rijn
- Seven borghen van steenen fijn.
- Wat sel ic segghen van oneeren
- Den ridderen ende den heeren.
- Die hier liggen in die sale?
- Wat sal wesen mine tale,
- Dat ic in deser duyster nacht,
- Aleen, sonder yemants cracht,
- Moet varen in een lant
- Dat mi in vremde ende onbecant?"
- Mit deser talen ghinc hem gereyden
- Die coninc karel ende cleyden
- Mit sinen dieren gewaden,
- Als die te stelen was beraden,
- Het was altoes sine seden,
- Datmen sine wapene deden,
- Ten bedde daer hi lach.
- Het waren die beste die ye man sach.
- Als hi aldus ghewapent was,
- Ghinc hi doer das palas.
- Daer en was slot noch dore so goet,
- Noch poerte diene wederstoet,
- Sine waren tegen hem ontdaen.
- Daer hi wilde, mocht hi gaen.
- Daer en was niemant dien sach,
- Want dat volc algader lach
- In vaste slape, als god woude.
- Dat dedi al door des conincs houde.
- Sine hulpe was hem bereet.
- Al hi die borchbrugge leet,
- Ghinc die coninc mit liste
- Totten stalle, aldaer hi wiste
- Sijn ors ende sijn ghesmiden.
- Sonder eenich langher beyden,
- Hi sadelet ende satter boven
- Opt ors, dat min mochte loven.
- Doe hi ter poorten ghereden quam,
- Sach hi daer ende vernam
- Den wachter ende den poortiere,
- Die luttel wisten dat hoer heere
- So na hem was mitten schilde.
- Si sliepen vaste alst god wilde.
- Die coninc beette ende ontdoet
- Die poorte die besloten stoet,
- Ende leyde sijn ors uut
- Sonder niemare ende gheluyt.
- Doen sat hij in sijn ghereyde,
- Die coninc karel ende seyde:
- "God, also ghewaerlijcke,
- Als ghi quaemt int aertrike
- Ende wort sone ende vader,
- Om ons te verlossen alle gader,
- Dat adam hadde verloren
- Ende dat na hem wert gheboren.
- Ghi liet u aenden cruce slaen,
- Doen u die joden hadden ghevaen.
- Si staken u met eenen speere.
- Si sloegen u, dies haddi geere.
- Dese bitterlike doot
- Ontfincdi, here, door onsen noot,
- Ende braeckt die helle daer naer,
- Also waerlic alst was waer,
- Ende ghi here lasaruse,
- Daer hi lach in sine cluse,
- Verwecket, heere, vander doot,
- Ende vanden steenen maket broot,
- Ende vanden water wijn,
- So moeti in mijn gheleyde sijn
- In desen deemsteren nacht.
- Ende verbaert aen mij u cracht.
- Oetmoedich god ende vader,
- Aen u keer ic mi alle gader."
- Hij was in vele gedochten,
- Waer hi best henen varen mochte,
- Daer hi stelens soude beghinnen.
- Doe quam hi in een wout binnen,
- Karel den edelen man,
- Dat niet van verre stont van daen.
- Doen quam gereden daer,
- Die mane scheen seer claer.
- Die sterren lichten aenden trone.
- Dweder was claer ende scone.
- Dus peynsde die coninc:
- Ic was gewone, voer alle dinck,
- Dieve te hatene daer icse wiste,
- Die den lieden mit liste
- Hoer goet stelen ende roven.
- Nu mach ik hem wel gheloven,
- Die leven bider avontueren.
- Si weten wel, dat si verbueren,
- Lijf ende goet, machmense vaen.
- Met doetse hangen ende thooft of slaen,
- Of sterven arger doot.
- Horen anxte is dicke groot.
- Nemmermer en ghevalt mi dat,
- Dat ic man doer cleynen scat,
- Sterven doe in al mijn leven.
- Ic hebbe elegast verdreven,
- Om cleyne sake uut minen lande,
- Die dicke set sijn lijf te pande,
- Om tgoet daer hi bi leeft.
- Ic wane, hi dicke sorghe heeft.
- Hi en heeft lant noch leen,
- Noch ander toeverlaet geen,
- Dan hi mit stelen can bejaghen.
- Daer op moet hi hem ontdraghen.
- Ic nam hem tlant des was hi heere,
- Dat mach hem nu wel rouwen seere,
- Beide borch ende lant.
- Des was ic herde onbekant,
- Want hi hadde in sine scaren,
- Die met hem onthouden waren,
- Ridders, serianten, een ghetal,
- Die ic heb onterft al,
- Beyde van lande ende van goede.
- Nu volghen si hem al doer armoede.
- Ic en laetse niewers gedueren.
- Die onthilde, ic daden verbueren,
- Beyde borch ende leen.
- Hi en hevet toeverlaet gheen.
- Hi moet hem al onthouden
- In wildernisse ende in wouden,
- Ende moet alleene bejaghen,
- Daer si hem alle op ondraghen.
- Mer so vele isser an:
- Hi en steelt gheen armen man,
- Die bi sijnre pinen leeft.
- Dat pelgrim ofte coepman heeft,
- Laet hi hem gebruken wel.
- Mer hi en versekert neymant el.
- Bisscoppen ende canoniken,
- Abden ende moniken,
- Dekenen ende papen,
- Daer hise can betrapen,
- Comen si in sijnre verde.
- Hi neemt hem mulen ende peerde,
- Ende steectse uut haren ghereyde,
- Dat si vallen op die heyde
- Ende neemt hem mit sijnre cracht,
- Al dat si daer hebben bracht:
- Silver, cleeder, facelment.
- Dus bejaecht hi hem omtrent,
- Daer hi die rike lieden weet.
- Hy neemt hem haren scat ghereet
- Beyde silver ende gout.
- Sine list is menichfout.
- Nyemant en cannen ghevaen.
- Nochtan heefter om ghedaen
- Menich man sine cracht.
- Ic woudic nu in deser nacht
- Sijn gheselle mochte wesen.
- "Ay heere god helpt mi tot desen!"
- Mit deser talen voer hi voort,
- Die coninc, ende heeft verhoort,
- Hoe een ridder quam ghevaren
- Inder selver ghebaren,
- Als die riden wil verholen,
- Met wapenen swart als colen.
- Swart was helm ende schilt,
- Die hi aenden hals hilt.
- Sinen halsberch mochtmen loven.
- Swart was den wapenroc daer boven.
- Swart was dors daer hi op sat.
- Ende quam enen sonderlingen pat
- Dwers riden doer den woude.
- Alsen die coninc ghemoeten soude,
- Segendi hem ende was in vare,
- Ende waende dat die duvel ware,
- Om dat hi was so swart al.
- Den riken god hi hem beval.
- Hi pensde in sinen moet:
- Ghevalt mi quaet ofte goet,
- En vlie te nacht doer desen.
- Ic sel der avonturen genesen.
- Nochtan weet ic te voren wel:
- Tis die duvel ende niemant el.
- Waer hi van gods halven iet,
- Hi en ware so swart niet.
- Tis al swart, peert ende man,
- Al dat icker aen gemerken can.
- Ic duchte dat mi toren naket.
- Ic bidde gode dat hi waket,
- Dat dese mi niet en scende.
- Ende als hi bet quam ghehende,
- Ende die swarte heeft vernomen
- Den coninc tegen teghen hem te comen,
- Pensde hi in sinen sin:
- Dese is verdoelt hier in
- Ende hevet sinen wech verloren.
- Ic mach dat aen hem verhoren.
- Hi salder laten die wapen sijn,
- Die die beste sijn in schine
- Die ic in seven jaren sach.
- Si verlichten als den dach,
- Van steenen ende van goude.
- Wanen quam hi in den woude?
- Ten was noyt arm man,
- Die sulcke wapen droech an,
- Ende sulc ors hadde bescreden,
- So sterc ende van scone leden.
- Doen hi quamen te gemoeten,
- Leden si al sonder groeten.
- Deen besach den anderen wel,
- Mer si seyden niet el.
- Als hi den coninc was leden,
- Diet swart ors had bescreden,
- Hitl hi stille ende dochte,
- Wie die ander wesen mochte;
- Waer om dat hi aldus lijt,
- Ende sijnre talen aldus vermijt
- Datti mi niet en groete
- Doen hi mi ghemoete,
- Ende om gheen dinc en vraghet.
- Ic wane dat hi quaet jaghet.
- Waer ic seker van dien,
- Dat hi quame om verspien,
- Datti mi ofte mine
- Brenghen wilde in pine,
- Teghen den coninc die ic ontrade,
- Hi en lede te nacht sonder scade.
- Wat node soude hi jaghen
- Achter bosschen ende haghen,
- Ofti mi niet en sochte.
- Biden heere die mi gewrochte,
- Hine ontrijt mi te nacht.
- Ic sel proeven sine cracht.
- Ic willen spreken ende kennen.
- Hi mach sulc sijn, ic sel winnen
- Sijn ors ende dat hi hevet an.
- Ende doen met lachter keeren dan.
- Hi es hier comen als een domme.
- Met dien werp hi sijn ors omme,
- Ende volchde den coninc naer.
- Doen hien achterhaalde daer,
- Riep hi lude: "Ridder ontbeyt.
- Waer na ist dat ghi rijt?
- Ic wil weten wat ghi soect,
- Ende jaecht ende roect,
- Eer ghi mi ontrijt van hier.
- Al waerdi noch so fier,
- Ende so diere uwe tale,
- Berechtes mi, so doedi wale.
- Ic wil weten wie ghi sijt,
- Ende waer ghi vaert op dese tijt.
- Ende hoe dat u vader hiet.
- En machs u verlaten niet."
- Doen antwoerde die coninc:
- "Ghi vraget mi so menich dinc.
- En wistu hoe berechten.
- Dan ic u seide bi bedwanghe.
- So haddic gheleeft veel te langhe,
- Dat mi een man dwinghen soude
- Van dinghen die ic niet en woude
- Berechten, ten ware mi lief,
- Coemter mi goet af of miskief.
- Wy sullen desen strijdt nu scheyden,
- Ende becorten tusschen ons beyden.
- Des conincs schilt van verdect,
- Ons teyken datter aene stoet.
- Hi en wildes niet voeren ontdect,
- Om teyken datter aene stoet.
- Hi en wilde niet dat men waer vroet,
- Dat hi ware die coninc.
- Si worpen omme met deser dinc,
- Haer orssen sterc ende snel.
- Si waren beyde ghewapent wel.
- Hare speeren waren sterc.
- Si versaemden in een perc,
- Mit sulcken nide onder hen tween,
- Dat dorsen bogen over haer been.
- Manlic vingen si ten swaerde
- Als die vechtens begaerde.
- Si vochten een langhe wile,
- Datmen gaen mochte een mile.
- Die swerte was sterc ende snel,
- Ende sine consten waren fel,
- So dat die coninc was in vare
- Ende waende dat die duvel ware.
- Hie sloech den swarten opten schilt,
- Dien hi manlic voor hem hilt,
- Dat hi in tween stucken vloech,
- Oft ware een linden loof.
- Die swarte sloech den coninc weder.
- Die swerde ghingen op ende neder.
- Opten helme, op die maelgien,
- Datter menich moeste faelgien.
- Daer en was halberch gheen so goet,
- Daer en dranc dore dat bloet,
- Doer die maelgien uuter huyt.
- Daer was van slaghen groot gheluyt.
- Die spaenderen vanden scilde vloghen.
- Die helmen op hoer hooft die boghen
- Ende ontfingen scarde ende vlegghen,
- Se scaerp waren der swaerden eggen.
- Die coninc pensde in sinen moet
- Dese is te wapene goet.
- Hi bringhet mi in sulken noot,
- Mine help God, ic blive doot.
- Sal ic liden mijns namen
- Ic souts mi eewelic scamen.
- Nemmermeer en gecreech ic eere.
- Doe sloech hi eenen slach so seere,
- Opten swarten die voor hem hilt,
- Dat hien nalic hadde ghevelt,
- Ende vanden ors tumelen dede.
- Tusschen hem beyde en was gene vrede.
- Ende die swarte sloech opten heere
- Ende sloech enden slach so seere,
- Opten hel dat hi booch,
- Ende tswaert in twee stucken vloech,
- So anxtelic was die slach.
- Als dat die swarte sach
- Datte sijn swaert hadde verloren:
- "Tfy dat ic ye was gheboren",
- Pensde hi in sinen moet:
- "Dat ick leve, waer toe ist goet?
- En hadde noyt gheval,
- Noch nemmermeer en sal.
- Waer mede sal ic mi verweeren?
- En prise mijn lijf niet twee peeren,
- Want ic ben ydelre hande."
- Doe docht den coninc scande,
- Op eenen te slane die voor hem helt.
- Doe sach hi liggen tswaert opt velt
- An twee stucken ghebroken,
- Doe pensdi: en is niet ghewroken,
- Die eenen wille slaen of deeren,
- Die hem niet en can gheweeren.
- Dus hilden si stille int wout.
- Haer ghepeyns was menichvout,
- Deen wie dander wesen mochte.
- "Biden heere die mi ghewrochte,"
- Sprac karel die coninc,
- "Ghi en berecht mi een dinc,
- Heer ridder, des ic u vraghe,
- Ghi hebt gheleeft al u daghe,
- Hoe ghi hiet of wie ghi sijt.
- Ende laet ons corten desen strijt.
- Mach ic met eeren liden,
- Ic sal u henen laten riden,
- Als ic uwe name weet."
- Die swarte sprac: "ic ben bereet,
- In dien dat ghi mi maket vroet,
- Wat nootsaken dat u doet,
- Dat ghi hier quaemt te nacht.
- Ende wiens toren dat ghi wacht."
- Doe seyde karel, die edel man:
- "Segt mi tierst, ic segh u dan,
- Wat ic hier soecke ende jaghe.
- En dar niet riden bi daghe,
- Ten is sonder nootsake niet
- Dat ghi mi dus ghewapent siet.
- Ic sel u seggen hoet coemt,
- Als ghimi uwen name noemt,
- Dies sijt seker ende vast."
- "Heere ic hete elegast."
- Dat sprac die ridder herde saen.
- "Ten is mi niet ten beste vergaen.
- Ic heb goet ende lant verloren,
- Dat ic hadde hier te voren,
- Bi onghevalle als menich doet.
- Soudic u al maken vroet,
- Hoe mine saken comen sijn,
- Eer ic u geseyde den sin,
- Het soude u dencken veel te lanc.
- Mijn gheluc is so cranc."
- Als dit die coninc verstoet,
- Was hi blide in sinen moet,
- Dant al gheweest hadde sijn,
- Tgoet dat vloy opten rijn.
- Hij seyde: "ridder, eyst u bequame,
- Ghi hebt mi geseit uwen name,
- Segt mi nu hoe ghi u gheneert.
- Bi al dat god hevet weert,
- Ende bi hem selven te voren,
- Van mi en hebdi gheenen toren.
- Ic sal u so vele berechten,
- Vraachdijs mi sonder vechten
- Ende sonder evelen moet,
- In dien dag ghi mi maket vroet."
- "Nu, sijts seker ende vast,
- Heere," antwoerde elegast,
- "En wil u niet helen,
- Daer ic bi leve, moet ic stelen.
- Mer so vele isser an,
- En steels geenen armen man,
- Die bij sijnre pine leeft.
- Dat pelgrim ofte coopman heeft,
- Dies laet ic hem ghebruken wel.
- Mer ic en verseker niemant el.
- Sint dat ic was gheboren,
- Ende ic mijn goet had verloren,
- Daer ic bi soude leven,
- Ende mi die coninc had verdreven,
- Karel, uut minen lande,
- Ic sal segghen, al ist scande,
- So heb ic mi onthouden
- In wildernissen ende in woude.
- Daer si twalef bi leven,
- Moetent rike luden gheven,
- Bisschoppen ende canoniken,
- Abden ende moniken,
- Deken ende papen.
- Daer icse can betrapen,
- Ic neme haer goet met liste.
- En weet gheen so vaste kiste,
- Noch geen slot so vast,
- Here," sprac elegast,
- "Weet icker goet in,
- Ic brenct in mijn gewin,
- Ende onder mine ghesellen.
- Wat soudicker meer of tellen.
- Minen list is menichvout.
- Mine gesellen zijn int wout,
- Ende ic voer om aventure ...
- Ende heb vonden enen sueren,
- Want ic heb mijn swaert verloren.
- En coeser gheen have voren,
- Ende ict weder hadde gheheel.
- Der slaghen heb ic ooc een deel,
- Meer dan ic ie ghewan,
- Op eenen nacht van eenen man.
- Nu seght mi ridder hoe ghi heet,
- Ende die ghene die u veet.
- Is hi van sulker machte,
- Dat ghi riden moet bi nachte?
- En condise niet ghematen,
- Die ghene die u haten?
- Ghi sijt te wapen so goet."
- Die coninc pensde in sinen moet:
- God heeft mijn bede ghehoort.
- Nu moetti mi beraden voort.
- Dit is de man die ic begheerde,
- Boven alle die leven op daerde,
- Mede te varen op desen nacht.
- God heefter mi te poente bracht.
- Nu moet ic liegen door den noot,
- Biden heere die mi gheboot.
- Sprac die coninc tot elegast:
- "Aen mi hebdi gheleyde vast,
- Ghestade vrient ende vrede
- Ic sel u seggen mine sede.
- Wat helpt vrienden verholen,
- Ic heb so vele goets gestolen.
- Waer ic mitter helft gevaen,
- Men liet mi waerlic niet ontgaen,
- Om mijn gewichte van van goude root.
- Maer het dede mi den noot.
- Noot breket alle strijt."
- "Nu segghet mi ridder wie ghi sijt?"
- "Ic sel u segghen minen name,
- Ist u willen ende bequame.
- Ic ben ghehieten adelbrecht.
- Ic pleghe te stelen over recht,
- In kerken ende in clusen,
- Ende in alle gods husen.
- Ic stele alderhande saken.
- En late niemant met ghemaken,
- Den rijcken ende den armen.
- Ic en achte niet op hoer carmen.
- En weet gheenen armen man,
- Daer ic mijn ghewin weet an,
- En naem hem liever sine have,
- Dan ic hem die mine gave.
- Aldus heb ic mi ontdraghen,
- Ende hebbe gheleyt nauwe lagen,
- Om eenen scat die ic weet.
- Mi souts wesen wel ghereet,
- Eer emmermeer quame morghen vroe,
- Haddicker goede hulpe toe,
- Also vele als ics rochte,
- Ende mijn peert dragen mochte.
- Die scat is qualic ghewonnen.
- God en souts ons niet vergonnen,
- Al hadden wijs een deel.
- Die scat leyt in een casteel,
- Daer mi die jegenode is cont.
- Al hadden wijs vijfhondert pont.
- Ten mochten niet deeren,
- Dan wi vanden sinen teeren.
- Laet ons gesellen zijn te nacht,
- Dat wi connen bejaghen
- Onthier ende het sel daghen.
- Dan sel ic deylen ende ghi sult kiesen.
- Dies achter gaet moet riesen."
- Elegast seide: "Waer leit den scat?
- Lieve gheselle, segt mi dat,
- Ende in wat stede?
- Het mach daer sijn, ic vare mede.
- Ic wils wesen vroet,
- Eer ic u volghe eenen voet."
- Doen seide karel die edel man:
- "Ic sel u berechten dan.
- Die coninc heeft so groot een scat.
- Hem mochte luttel deeren dat
- Van sinen scatte, daer hi leghet."
- Als dit die coninc seghet,
- Datti hem selven stelen wille,
- Elegast en sweech niet stille.
- Hi seyde: "dat moet mi god verbieden!
- Sien leven niet, diet mi rieden,
- Dat ic den coninc dade scade.
- Al heeft hi mi bi quaden rade,
- Mijn goet ghenomen ende verdreven,
- Ic sel hem al mijn leven
- Goet vrient sijn na mijn macht.
- In sijn scade en coem ic te nacht,
- Want hi is mijn gherechtich heere.
- Dade ic hem anders dan eere,
- Ic mocht mi scamen voor gode.
- Men mochs mi gheraden node."
- Als dit de coninc verstoet,
- Was hi blide in sinen moet,
- Dat hem elegast, die dief,
- Goet gonste ende hadde lief.
- Hi pense, mochti keeren,
- Behouden sijnder eeren,
- Hi souden goets so vele geven,
- Hi souder mit eeren sijn daech op leven,
- Sonder stelen ende roven,
- Des moch men hem gheloven.
- Na dien gepense daer hi in was,
- Vraechdi elegaste das,
- Oft hien iewers wilde leyden,
- Daer si tgoet onder hem beyden
- Mochten bejaghen op dien nacht.
- Hi deder toe sijn beste cracht,
- Geerne ende sijn behendichede,
- Woude hi hem laten varen mede,
- Elegast seyde: "ja ic, gerne.
- Men weet niet, ghi segt in scerne.
- Theggericx van eggermonde
- Daer moghen wi stelen sonder sonde,
- Die des conincs suster heeft.
- Het is scade dat hi leeft.
- Hi heeft den menighen verraden
- Ende ghebrocht in groter scaden,
- Ende ooc mede sinen heere
- Soude nemen lijf ende eere,
- Mocht na sinen wille gaen.
- Dat heb ic wel verstaen.
- Nochtan houti vanden coninc
- Herde minich scone dinc,
- Beyde borch ende leen.
- Al en haddi toeverlaet gheen,
- Het mochten luttel deeren,
- Dat wi vanden sinen teeren.
- Daer selen wi varen, ist u wille."
- Die coninc peynsde ende sweech al stille:
- Na dat daer gescepen stoet,
- Dat daer ware stelen goet.
- Al hadden sijn suster ghevangen,
- Si souden node laten hangen.
- Dus droeghen si overeen,
- Daer te varen onder hem tween,
- Te stelen eggerics scat.
- Die coninc hem niet en vergat.
- Si quamen ghereden op een velt,
- Op haer orssen wel ghestelt.
- Daer vonden si een ploech staen.
- Die coninc beette neder saen.
- Ende elegast reet voren,
- Daer si den wech hadden vercoren.
- Die coninc namt couter in die handt,
- Dat hi aen den ploech vant.
- Hi pensde in sinen moet:
- Dat is ten ambacht goet.
- Die graven wil in borghen,
- Hi moeter toe besorghen,
- Sulke dinc als hem bedorste.
- Doe satti op al sonder vorste,
- Ende volchde elegaste
- Na met sporen vaste,
- Die een luttel was voren.
- Verstaet, so moechdi horen!
- Doen si quamen voor die veste,
- Die die scoonste was ende die beste,
- Die iewaert stoet opten rijn,
- Elegast sprac: "hier wil ic sijn.
- Nu siet," seyti, "Adelbrecht,
- Wat dunct u ghedaen te recht?
- Ic wil werken bi uwen rade.
- Mi ware leet, ghesciede u scade,
- Datmen mochte seggen dan,
- Het quam al bi desen man."
- Die coninc antwoerde na dier talen:
- "En quam noyt binnen der salen,
- Noch inden hove, daer ic weet.
- Het soude mi wesen onghereet,
- Soudicker nu binnen gaen.
- Aen u selven moet al staen."
- Elegast seyde: "tis mi lief.
- Sidi een behendich dief,
- Dat sal ic cortelic verstaen.
- Laet ons een gat maken gaen,
- Inden muer ter goeder ure,
- Daer wi moghen crupen dore".
- Dit loveden si beyde wel.
- Si bonden hoer orssen snel,
- Ende ghinghen ten muere sonder gheluyt.
- Elegast trac een yser uut.
- Daer hi den muer mit soude picken
- Doe began die coninc te trecken
- Tcouter voert vander ploech.
- Doe stont elegast ende loech,
- Ende vraechde waer hijt dede mken.
- "Constic tsmeesters huus gheraken,
- Ic dede maken sulc een.
- Dus ghedaen en sach ic noyt gheen,
- Beseghen tot sulcken sticken,
- Daer men mee doer soude picken."
- Die coninc sprac: "het mach wel sijn.
- Ic quam ghevaren opten rijn,
- Dies is leden der derden dach,
- Dat ic voer om mijn bejach,
- Daer moestic yser laten.
- Het ontviel mi opter straten,
- Daer men mi volchde achter.
- En dorste niet keren door den lachter.
- Dus was ic mijns yser ane,
- Ende dit nam ic bider mane,
- Daer ic vant aen een ploech."
- Elegast sprac: het is goet genoech,
- Mogen wi daer te punte in geraken.
- Al soudemen ons heden vaen."
- Elegast sprac: "ic sals beginnen,
- Laet sien, wat seldi daer an winnen!
- Ghevalt, dat men ons wille vaen,
- Ic sal also wel als ghi ontgaen."
- Elegast eyste sijn cruyt weder.
- Die coninc sochte op ende neder,
- Weder ende voort in sinen monde.
- Mer hi verlost ter stonde.
- Hi en mochs vinden niet.
- Die coninc sprac: "Wats mi gesciet?
- Mi dunct, ik hebbe mijn cruyt verloren,
- Dat ic had hier te voren,
- Beloken tusschen minen tanden.
- Bi mijnre wet, dat mach mi anden."
- Doe loech elegast echt
- Ende seide: "Steeldi over recht?
- Hoe coemt, datmen u niet en vaet,
- Telken als ghi stelen gaet?
- Dat ghi leeft, is wonder groot.
- Ghi en waert langhe wile doot,
- Gheselle," seit hi onverholen,
- "Ic heb u cruyt ghestolen.
- Ghi en weet van stelen niet een hare."
- Die coninc peynsde: ghi segt ware.
- Mittien lieten si die tale.
- Gode beval hi al te male,
- Dat hien moeste borghen.
- Een deel was hi in sorghen.
- Nochthans consti beheyndichede
- Daer hi alle die ghene mede
- Slapen dede vanden sale.
- Ende ontsloot dan al te male
- Sloten die men met slotelen sloot,
- Waren si cleyne ofte groot
- Ende ghinc ten scatte, daer hi lach,
- Eert yemant hoorde of sach,
- Ende haelde ende brochte,
- Also vele als hem goet dochte.
- Doen wilde karel van danen riden.
- Elegast die hiet hem ontbeiden.
- Hi soude om eenen sadel gaen,
- Die in die camer ware ghestaen,
- Daer eggeric ende sijn wijf in lach,
- Die scoonste die noyt man sach.
- Hi en leeft niet die u gheseyde
- Die verweentheit vanden gereyde.
- Ende ooc aen dat voerboech
- Es te prisene ghenoech.
- Daer hanghen aen hondert scellen groot,
- Die alle sijn van goude root,
- Ende clincken als eggeric rijt.
- "Gheselle, doet wel, ende ontbeyt.
- Ic sal hem sinen sadel stelen,
- Al soudic hanghen bider kelen."
- Dit was den coninc onbequame.
- Hi hadde eer ontbeert der vrame
- Vanden sadel ende tghewin,
- Dan elegast keerde weer in.
- Als elegast quam ten ghereyde
- Daer ic heden eer of seide,
- Als hi twaende draghen dan,
- Die scellen, diere hinghen an,
- Gaven sluc enen clanc,
- Datter eggeric bi ontspranc
- Uut sinen slape ende seyde:
- "Wie is daer te minen ghereyde?"
- Hi woude trecken sijn sweert,
- Haddet die vrouwe niet gheweert,
- Die hem seinde ende vraghede,
- Wat ware dat hi jaghede;
- Often alven wilden verleiden.
- Si namt swaert al mitter scheyden
- Ende seyde: "daer en mach niemant in
- Comen sijn meer noch min.
- Tis ander dinc dat u deert."
- Si bemaenden ende beswert,
- Dat hi haer seide sijn ghedochte,
- Waer bi dat hi niet en mochte
- Slapen binnen drien nachten,
- Dat si conste ghewachten,
- Noch eten binnen drien daghen.
- Dit began si hem te vraghen.
- Vrouwen list is menichfout,
- Sijn si ionc, sijn si out.
- So langhe lach si hem an,
- Dat hi haer te segghen began,
- Dat hi des conincs doot hadde ghesworen.
- Ende die te doen waren vercoren,
- Soude cortelike comen.
- Hi gincse haer bi namen nomen;
- Hoe si hieten, wie si waren,
- Die den coninc wilden daren.
- Dit hoorde elegast,
- Ende hielt in therte vast.
- Hi pensde hi sout brenghen voort,
- Die ondaet ende die valsche moort.
- Alse dit die vrouwe hoorde,
- Si antwoordde na den woorde.
- Si seyde: "mi waer liever vele,
- Datmen u hinghe bider kele,
- Dan dat ic ghedoghen soude."
- Ende eggeric sloech so houde,
- Die vrouwe voor nase ende mont,
- Dat haer tbloet ter stont
- Ter nase ende te monde uut brac.
- Si rechte haer op ende stac
- Haer aenschijn over tbedde boom.
- Elegast wasser bi ende nams goom,
- Ende croper liselike toe.
- In sinen rechten hantschoe
- Ontfinc hijt bloet vander vrouwen,
- Omdat hijt wilde scouwen
- Diet den coninc te voren brochte,
- Dat hider hem voor wachten mochte.
- Doe seyde elegast een ghebede,
- Daer hi alle die ghene mede
- Slapen dede ende die vrouwe.
- Ende sprac sijn woert mit trouwe,
- Dat si beyde sliepen vast.
- Doen ontstal hem elegast
- Sinen sadel ende sijn swaert,
- Dat hi lief hadde ende weert,
- Ende maecte hem sijnre vaerde
- Buten den hove tsinen paerde,
- Totten coninc dien seere verdochte
- Al om toget dat elegast brochte.
- Hine hadder niet langher gestaen,
- Hadt na hem moghen gaen,
- So seere was hi vererret.
- Hi vraechde waer hi had gemerret.
- Elegast seide: "in mochs niet,
- Bi al dat god leven liet.
- Tis wonder dat mi thert niet en breect,
- Vanden rouwe, die daer in steect.
- Si en breect nemmermeer,
- Door rouwe, noch door seer,
- Dies ben ic seker te voren,
- Si heeft so groten toren.
- Gheselle," seiti, "dits ghereyde,
- Daer ic u heden of seide.
- Ens so goed no so scoene
- Onder gode vanden trone.
- Dit hout. Ic sal gaen,
- Eggeric sijn hooft af slaen,
- Of doden met enen knive,
- Daer hi leyt bi sinen wive.
- Dat en lietic om al dat gout
- Dat die warelt inne hout.
- Ic sel weder keren schiere."
- Doen bemaenden die coninc diere,
- Dat hi hem seide door wat sake
- Hi was so sere tongemake.
- "Ende side niet al ghesont,
- Ende hebt wel .x. hondert pont,
- Ende tghereyde daer ghi om ginct?"
- "Ay heer, het is al ander dinc,
- Dat mijnre herten deert
- Ende minen droeven sin verteert.
- Ic heb minen heer verloren.
- Ic hadde toeverlaet te voren,
- Te comene te minen goede,
- Ende te verwinnen minen armoede.
- Mijn heer sel sterven morgen vroe.
- Ic mach u seggen hoe:
- Eggeric heeft sinen doot gesworen."
- Doen wiste karel wel te voren,
- Dat hem god te stelen ontboot,
- Om te bescudden vander doot.
- Hi danckes oetmoedelike
- Gode van hemelrike.
- Doe antwoerde die coninc saen:
- "Hoe so waendi dan tontgaen?
- Of ghien staect met eenen knieve,
- Daer hi leit bi sinen wive,
- Thof selde verstormen al.
- Ghi en had meer dan gheval,
- Ghi sout saen hebben vercoft,
- Ende u lijf ende eynde brocht,
- Soudi u worpen inden noot.
- Sterft di coninc, so is hi doot.
- Wat talen souder of wesen?
- Ghi sout des rouwen ghenesen."
- Dit seidi doer behendichede,
- Om elegast te proeven mede.
- Nochtan wasser een ander an,
- Hi hadde gerne gheweest van dan.
- Dlange letten van hem leet.
- Elegast antwoerde ghereet:
- "Bi al dat god leven liet,
- Waerdi mijn gheselle niet,
- Ten bleve te nacht onghewroken,
- Dat ghi hebt so na ghesproken
- Den coninc karel minen heere,
- Die waerdich is alder eere.
- Biden heere die mi gewrochte,
- Ic sel vorderen mijn ghedochte,
- Ende wreken minen toren
- An die sconincs doot hebben ghesworen,
- Eer ic vander buercht scheide,
- Gaet mi te lieve of te leyde."
- Die coninc peynsde: dits mijn vrient,
- Al heb ics qualic op hem verdient.
- Ic salt beteren, mach ic leven.
- Hi sal verwinnen al sijn sneven.
- "Gheselle, ic sel u wisen bet,
- Hoe ghien brenghen selt int net,
- Eggerike van eggermonde.
- Rijt inder morgenstonde
- Totten coninc daer ghin vint.
- Vertelt hem ende ontbint,
- Die ondaet ende die moort.
- Als hi sal horen u woert,
- Ghi selter bi versoenen al.
- U loon en sel niet wesen smal.
- Ghi moghet riden bi sijnre siden,
- Alle u daghe ende u tiden,
- Of ghi sijn broeder waert,
- So langhe als u god ghespaert."
- Elegast seyde: "wat mijns ghesciet,
- En come voor den coninc niet.
- Die coninc is te mi so gram,
- Om dat ic hem eens nam
- Van sinen scatten sulcen scaerde,
- Dat cume ghedroech twee paerden.
- Ic en come niet daer hi mi saghe,
- Noch bi nachte, noch bi daghe.
- Dats pine teghen spoet."
- "Wil ic u segghen wat ghi doet?"
- Sprac karel die edel man,
- "Rijt wech in uwen dan,
- Daer ghi liet u ghesellen.
- Nu sal ic u vertellen.
- Voert voor u ons bejach,
- Tot morghen opten dach.
- Dan deylen wi met ghemake.
- Ic sal bode sijn vander sake,
- Totten coninc daer icken weet.
- Sloech men doot, het waer mi leet."
- Mit deser talen dat si schieden.
- Elegast voer tot sinen lieden,
- Daer hise liet inden dan.
- Ende karel, die edel man,
- Voer tynghelen in sijn casteel.
- Sijn herte was sonder riveel,
- Datten diegheen wilde verraden,
- Die hem soude staen sin staden,
- Soude recht na rechte staen.
- Noch stont die poorte ontdaen,
- Ende sine lieden sliepen alle.
- Hi bant dorst opten stalle,
- Ende ginc ter cameren daer hi lach,
- Eert yemant hoorde ofte sach.
- Hi hadde sijn wapen af ghedaen,
- So was die wachter gestaen,
- Ter hoger tinnen ende blies den dach,
- Diemen scone verbaren sach.
- Doen wert in wake menich man,
- Dien god den slaep seynde an,
- Doe die coninc stelen voer.
- Dat was hem een scone boer.
- Doe seynde karel die coninc
- Eenen sinen camerlinc,
- Om sinen verholen raet,
- Ende seyde hoet met hem staet:
- Dat hi wiste wel te voren
- Dat sinen doot ware gesworen
- Van eggeric van eggermonde,
- Die comen sal in corter stonde
- Met alder macht vanden lande,
- Om hem te doene scande
- Als te nemen sijn leven.
- Dat si hem goeden raet geven,
- Dat hi behoude sijn eere,
- Ende si haren gherechten heere.
- Doe seide die hertoghe van bayvier:
- "Laetse comen, si vinden ons hier.
- Het sel den menighen costen tleven.
- Ic sal ons goeden raet gheven:
- Hier is menich sterc fransoys
- Uut vrancrijc ende baloys
- Menich ridder, menich seriant,
- Die mit u quamen hier int lant.
- Si selen hem wapenen alte male,
- Ende trecken in die hoghe sale.
- Ende ghi selve heer coninc,
- Sult ghewapent staen inden rinc.
- Die u daer slaen wil of deeren,
- Wi sellen wel weeren.
- Dbloet sel hem lopen ten sporen,
- Ende eggeric als te voren.
- Desen raet dochten wesen goet.
- Si wapenden hem metter spoet,
- Alle die daertoe dochten,
- Ende wapenen dragen mochten,
- Beyde cleyn ende groot.
- Si duchten swaren wederstoot.
- Eggheric was van groter macht,
- Ende alle die hadden cracht
- Weder ende voort opten rijn
- Woude in sijnre hulpen sijn.
- Men dede ter poorten .LX. man,
- Gewapent ende halsberch an.
- Doen eggerics lieden quamen gewaren
- In tconincs hove met groter scaren,
- Ontdede men die poorte wide
- Ende lietse alle door liden.
- Doen si quamen int hof,
- Dedemen hoer cleeder of.
- Men vant naest haren live
- Witte halsberghe, scarpe knive.
- Die ondaet was openbaer.
- Men leydse gevanghen daer,
- Altemet dat si quamen,
- Tot datmense had benamen.
- Eggeric quam gevaren
- Al mitter lester scaren,
- Daer alle die moort aene stoet.
- Doe hi gebeet was te voet,
- Ende waende gaen in die sale,
- Slootmen die poorte te male.
- Men vincken alsmen dander dede.
- Men vant gewapent sine leden,
- Bat dan yemand die daer was.
- Men leyde hem in dat pallas
- Voor den coninc sinen heere.
- Dat mochti hem wel scamen seere.
- Die coninc leide hem vele te voren.
- Hi en woudes een niet horen.
- Hi lochende der ondaet
- Ende seide: "heer coninc, hebt beteren raet.
- Dadi mi lachter onverdient,
- Ghi hadt verloren menigen vrient.
- Ghi en waret ooc niet so coene,
- Nog geen uwer baroene,
- Die mi op dorste staden,
- Dat ic u hadde verraden.
- Woer yemant dies begaerde,
- Ic daet hem lochenen mitten swaerde,
- Of mitten oerde van minen spere.
- Nu come voort dies begheere.
- Als dit die coninc verstoet,
- Was hi blide in sinen moet
- Ende seynde om elegaste,
- Boden na boden vaste,
- Daer hi was inden woude,
- Ende ontbloot hem herde houde,
- Ende vergaf hem alle misdaet.
- In dien dat hi den camp bestaet
- Tegen eggericke,
- Hi souden maken rike.
- Die boden en letten niet
- Sie deden dat hem die coninc hiet.
- Sie voeren tot dien stonden
- Daer si elegast vonden.
- Dat hem die coninc beval
- Seiden si elegast al,
- Die seere verbliden vanden woerde.
- Als hi die nieumare hoorde,
- Hi liet leggen sijn ghereyde
- Sonder eenich langher beyden,
- Dat hi eggericke stal.
- Daertoe hiet hi ende beval,
- Datten Karel wilde geleiden.
- Hi soude eggerics lachter breiden.
- Hi swoer bi sijnre kerstenhede,
- Waer hem god sculdich een bede,
- Hi en begeerde ander goet,
- Dan hi den camp vechten moet,
- Over sinen gherechten heere,
- Om te behouden sijn eere.
- Si voeren wech metter spoet.
- Doen elegast, die ridder goet,
- Quam in des conincs sale,
- Nu moechdi horen sine tale.
- Hi seide: "god hoede dit ghesinde:
- Den coninc ende dattic hier vinde.
- Mer eggeric en groetic niet.
- God die hem crucen liet
- Om onse wille, ende vele vermagh,
- Die late mi sien op desen dach,
- En maria, die maghet soete,
- Datmen te winde hanghen moete,
- Eggheric van eggermonde.
- Mochte god doen sonde,
- So heeft hi sonde ghedaen,
- Dat hi der galgen is ontgaen,
- Om dat hi swoer mijns heeren doot,
- Sonder bedwang oft noot."
- Als dit elegast hadde gesproken,
- Eggeric hadt gerne ghewroken,
- Mer hi en hads die macht niet.
- Daer was menich die hem liet.
- Die coninc antwoerde daer of:
- "Sijt willecome in mijn hof.
- Nu vermaen ic u bi alle dien,
- Die gods van sonden plien,
- Dat ghi segt ende brenct voort,
- Die ontdaet ende die moort,
- Van eggeric die ghi hier siet,
- Dat en laet door niemand niet.
- Ghi en segt waer ende niet el,
- Hoe die aventuer gevel."
- Elegast seide: "Gerne,
- Mi en staets niet tontbeerne.
- Ic ben seker wel te voren,
- Dat eggeric heeft u doot gesworen.
- Ic hoordet hem seggen daer hi lach,
- Ende gaf sinen wive enen slach,
- Dat sijt dorste anden,
- Dat haer tbloet ten tanden,
- Ter nase ende ter mont uut brac.
- Si rechte haer op ende stac
- Haer aenschijn over tbeddeboom.
- Ic was daer ende nams goom,
- Ende croper liseliken toe.
- In minen rechteren hantscoe,
- Ontfinc ict bloet vander vrouwen."
- Doen liet hi den coninc scouwen,
- Ende met hem allen diet wilden sien.
- Dorste eggeric lochenen van dien,
- Ic dade hem lien der ondaet,
- Eer die sonne onder gaet,
- Tusscen ons tween teere werven,
- Oft ic sal mijn lives derven."
- Eggeric antwoerde nadien:
- "Die lachter en mach mi niet ghescien.
- Ten sal ooc niemen wesen lief,
- Dat ic jeghen een verbannen dief,
- Minen hals soude aventueren.
- Hi soude bet campen met gheburen
- Dan hi jeghen mi soude."
- Elegast seide also houde:
- "Ja, en ben ic hertoghe, alse ghi sijt?
- Ende was ic verbannen enen tijd,
- Ende mi die coninc mijn goet nam,
- Omdat hi te mi was gram,
- Verranesse ende moort stond ic ave.
- Ic hebbe ghenomen groete have
- Den riken lieden van haren goede.
- Dat dede mi noot ende armoede.
- Maer dat ghi een morder sijt,
- Ghine moget ontsegghen camp no strijt,
- Ter werelt negenen man,
- Die u dachvaert in den crijt."
- Die coninc antwoerde daer na:
- "Bi mine wet, ghi seght waer.
- Soudicken voeren na recht,
- Ic dede slepen eenen knecht
- Ende hanghen bider kelen.
- Doen ghinc met eggeric uuten spele,
- Ende peynsde in sinen moet:
- Na dat ghescepen stoet,
- Beter is camp dan hals onttween.
- Int hof en was man gheen
- Die spreken dorste siere vromen.
- Dus wert den camp anghenomen,
- Een luttel nader noenen.
- Die coninc ontboet sijn baroenen
- Dat ghi ghewapent te velde waren.
- Hi en wildes camps niet ontbaren.
- Hi liet den camp ghereyden
- Ende bat god, dat hi moest scheiden
- Den camp ende tgevechte
- Na reden ende na rechte.
- Die coninc troeste elegast wel
- Ende seide: verghinghe wel sijn spel,
- Ende behilti sijn leven,
- Hij sounden sijnder suster geven,
- Die eggeric hadde tevoren,
- Die sijn doot hadde gesworen.
- Men sloech coerden opt velt,
- Daer menich man gewapent helt,
- Een luttel voor vespertijt.
- Elegast quam eerst int crijt,
- Om datti aenlegger was.
- Hi beette neder int gras
- Ende viel in knien ghebede
- Ende seide: "God doer u goedertierenhede,
- Ic come u heden te ghenaden,
- Van allen minen misdaden,
- Die mi ye ghevel.
- Ic kenne mine misdaet wel.
- Oetmoedich god diet vermach,
- En wreect niet op desen dach,
- An mi mine sonden.
- Doer u heylighe vijf wonden,
- Die ghi ontfinc doer ons misdaet,
- Hebt heden mijns raet,
- So dat ic niet en sterve,
- Noch in den camp en bederve.
- Ist dat mi die sonden niet en slaen,
- So waen ic wel van hier ontgaen.
- Volmaekt god, door u doghet,
- Ic biddu dat ghi mi verhoghet,
- Ende maria, soete vrouwe,
- Ic wil u dienen mit rechter trouwe,
- Ende nemmermeer voort aen,
- En werdic rover, noch scaecman
- In wildernissen ende in wouden,
- Mach ic hier mijn lijf behouden."
- Doen hi eynde sijn ghebede,
- Seghende hi alle sine lede,
- Scone miet sijnder rechter hant,
- Seghende hi sijn ridders ghewant,
- Ende seghende dors dat voor hem stoet,
- Ende bat gode dor oetmoet,
- Dat hem draghen moest met eeren
- Ende uuten campen laten keeren.
- Met dat hi die tale seyde,
- Sat hi op in sijn ghereyde
- Ende hinc den scilt ter luchter side.
- Nu naket eenen groten stride.
- Hi nam in die hant dat speere.
- Ende eggeric quam met grooter geere
- Ten crite wert gewapent wel,
- Die seere was int herte fel.
- Hi en seide noch en dede.
- Hi sloech met sporen vaste
- Ende reet op elegaste
- Ende elegast op hem weder,
- Die eggeric stac door tleder
- Vander curien met gewelt,
- Datti neder viel opt velt
- Vanden orsse op daerde.
- Eggheric vinc ten swaerde,
- Dat hi trac uuter scheyde,
- Ende sprac: "Nu sal ic doden beyde,
- Elegast, u ende u paert,
- Ten si, dat ghi ter vaert
- Neder beet op die moude:
- So mach u ors dlijf behouden.
- Hets so sterc ende so groot,
- Het waer scade, sloech ict doot.
- Die menighe soudt beclaghen.
- Moechdi u lijf ontdraghen,
- So behoudi u paert."
- Elegast sprac ter vaert:
- "En ware dat ghi te voet sijt,
- Ic soude corten dese strijt.
- En wil u niet te voete slaen.
- Ic wil prijs an u begaen,
- Al souts mi sijn te wors.
- Nu sit weder op u ors.
- Laet ons vechten ridder wise.
- Ic heb liever datmen mi prise,
- Dan ic u sloeghe bi rampe,
- Al soudic bliven inden campe."
- Dit was den coninc karel leet,
- Dat elegast so langhe meet
- Ende eggericke spaert.
- Eggeric vinc sijn ors ter vaert.
- Doe elegast die tale seide,
- Sat hi op in sijn ghereyde.
- Doen verhief daer een strijt,
- Tot langhe na vespertijt.
- En quam niemant daer, hi sach
- So fellen strijt op enen dach.
- Hare slaghen waren onghiere.
- Hare helmen bernden ghelijc den viere
- Vanden voncken diere uut vloghen.
- Si waren beyde hertoghen,
- Die daer vochten den camp.
- Al geviel elegast die scamp,
- Datti hadde sijn lant verloren,
- Hi was hertoghe alse tevoren.
- Doe seyde die coninc van vrancrike:
- "God, also gewaerlike,
- Als ghi hier moghende sijt,
- So moetti corten desen strijt
- Ende dit langhe gevechte
- Na redene ende na rechte."
- Elegast had een swaert,
- Het was sijns gewichte waert
- Van ghemalen goude root,
- Elcken man te sijnre noot,
- Die coninc hadt hem gegeven.
- Elegast die hevet verheven,
- Ende sloech eenen slach so seere
- Bider hulpen van onsen heere
- Ende door sconincs bede,
- Die hi over elegast dede,
- So, dat hi hem rovede
- Die meeste helt vanden hovede,
- Ende viel doot uten gereide.
- Dit sach die coninc ende seyde:
- "Gewaerich god, ghi sijt hierboven.
- Met rechten mach ic u loven,
- Die mi so menighe eere doet.
- Die u dienen, si sijn vroet.
- Ghi moghet helpen ende beraden
- Alle, die aen u soeken ghenaden."
- Nu wil ic corten dese dinc.
- Men sleepte eggeric ende hinc,
- Ende alle die verraders mede.
- Daer en halp saec noch bede.
- Elegast bleef inder eere
- Dies dancti onsen heere.
- Die coninc gaf hem eggerics wijf.
- Si waren tsamen al haer lijf.
- Dus moet god al onse saken
- Voor onse doot te goede maken.
- Des gonne ons die hemelsche vader.
- Nu segghet amen alle gader.
Advertisement
Add Comment
Please, Sign In to add comment
Advertisement