រថយន្តស៊េរីទំនើប BMW ពាក់ស្លាកលេខភ្នំពេញ 2AY.3333 បើកបុករះម៉ូតូរ៉ឺម៉ក២គ្រឿង មនុស្សខ្ទាតចេញពីរ៉ឺម៉ក
សង្គម November 23, 2016 08:04AM
ភ្នំពេញ ៖ រថយន្តស៊េរីទំនើបម៉ាក BMW មួយគ្រឿង ដែលបើកបរដោយបុរសជនជាតិបរទេសម្នាក់ ក្នុងល្បឿនយ៉ាងលឿន ហើយជ្រុលទៅបុករះម៉ូតូរ៉ឺម៉ក២គ្រឿងដែលចតនៅចិញ្ចើមផ្លូវបណ្ដាលឱ្យក្រឡាប់ រួចហើយរថយន្តបង្កបានបន្តល្បឿនរត់ដល់ក្លោងទ្វារវិមានកុលាប (កោះពេជ្រ) ទើបឃាត់ជាប់។
គ្រោះថ្នាក់ចរាចរណ៍ខាងលើបានកើតឡើងនៅវេលាម៉ោង៤ និង២០នាទីទៀបភ្លឺ ថ្ងៃទី២៣ ខែវិឆ្ឆិកា ឆ្នាំ២០១៦ នៅត្រង់ចំណុចក្បែរអាគារប៊ូឌិញតាមបណ្ដោយផ្លូវសុធារស ស្ថិតក្នុងសង្កាត់ទន្លេបាសាក់ ខណ្ឌចំការមន។
តាមប្រភពព័ត៌មានពីប្រជាពលរដ្ឋដែលនៅកន្លែងកើតហេតុបានឱ្យដឹងថា នៅមុនដំបូង គេបានឃើញរថយន្តបង្កម៉ាក BMW ពណ៌ស ពាក់ស្លាកលេខភ្នំពេញ 2AY.3333 ដែលបើកបរដោយបុរសម្នាក់ជាជនជាតិបរទេស ធ្វើដំណើតាមបណ្ដោយផ្លូវសុធារស ទិសដៅពីជើងទៅត្បូងក្នុងល្បឿនយ៉ាងលឿន។
ខណៈមកដល់ចំណុចកើតហេតុខាងលើ ស្រាប់តែជ្រុលទៅបុករះម៉ូតូរ៉ឺម៉ក់កង់បី ដែលចតលើចញ្ចើមផ្លូវសម្រាកដូចរាល់យប់ ចំយ៉ាងពេញទំហឹង បណ្ដាលឱ្យមនុស្សខ្ទាតចេញពីរ៉ឺម៉ក រងរបួសស្រាល។ ដោយឡែករ៉ឺម៉ក់ម៉ូតូបានក្រឡាប់ផ្ងារជើងឡើងលើរងការខូចខាតយ៉ាងដំណំ។
ប្រភពដដែលបានបន្តថា ក្រោយពីបង្កហេតុរួច រថយន្តបង្កនោះមិនបានឈប់នៅកន្លែងកើតហេតុទេ គឺបានបន្ថែមល្បឿនបើករត់គេចខ្លួនទាំងខ្ទេចកាងនិងបែកកង់ពីមុខ រហូតទៅដល់មុនក្លោងទ្វារវិមានកុលាប ក្បែរស្ពានកោះពេជ្រ ទើបបងប្អូនប្រជាពលរដ្ឋជិះដេញតាមឃាត់រថយន្តបង្កនោះជាប់តែម្ដង។
មួយសន្ទុះក្រោយមក ទើបមានសមត្ថកិច្ចមូលដ្ឋានចុះមកដល់កន្លែងកើតហេតុនិងសម្រួលភាគីទាំងសងខាងដោះស្រាយគ្នា តែភាគីខាងរថយន្តបង្កចង់ទៅដោះស្រាយគ្នានៅអធិការដ្ឋានប៉ូលិសខណ្ឌវិញ។
បន្ទាប់មកសមត្ថកិច្ចក៏បាននាំយករថយន្តបង្កនិងរ៉ឺម៉ក់ខាងលើ យកទៅរក្សាទុកនៅអធិការដ្ឋានខណ្ឌចំកាមន រង់ចាំដោះស្រាយគ្នានៅពេលក្រោយ៕